पूर्वप्रधानमन्त्री तथा नेपाली काँग्रेसका निवर्तमान सभापति शेरबहादुर देउवा आज काठमाडौं फर्कदैछन् ।
अध्यागमन स्रोतका अनुसार विमान १२: ४५ बजे एयरलाइन्सको उडानबाट त्रिभुवन अन्तर्राष्ट्रिय विमानस्थलमा अवतरण हुँदैछन् ।
काठमाडौं प्रहरीका प्रवक्ता एसपी दान बहादुर थापाका अनुसार उनलाई त्रिभुवन अन्तर्राष्ट्रिय विमानस्थलको सिनामंगलस्थित मूल प्रवेशद्वार गोल्डेनगेटदेखि उनको बासस्थान महाराजगञ्ज, चुनादेवीसम्म सुरक्षा सहित (एस्कर्ट) जाने व्यवस्था मिलाइएको छ ।
प्रहरीका अनुसार उनलाई स्वागत गर्न चाहने कार्यकर्तालाई गोल्डेनगेटसम्म भेला हुने अनुमति दिइने छ । विमानस्थलको अन्तर्राष्ट्रिय टर्मिनलस्थित आगमन द्वारमा भने पार्टीका केही शीर्ष नेतालाई मात्र प्रवेश अनुमति दिइने भएको छ । यो कार्यको व्यवस्थापन त्रिभुवन अन्तर्राष्ट्रिय विमानस्थलको अध्यागमन कार्यालयले गर्ने भएको छ ।
गत वर्ष भदौ २४ मा जेन–जी आन्दोलनका प्रदर्शनकारीबाट शारीरिक दुर्व्यवहारको शिकार भएका देउवा स्वास्थ्य उपचारका लागि सिंगापुर गएका थिए । उनी पाँच महिनापछि आज बैंकक हुँदै काठमाडौं फर्किन लागेका हुन् ।
