प्रधानमन्त्रीका प्रेस तथा अनुसन्धान विज्ञ दीपा दाहालले पत्रकार पक्राउ प्रकरणमा प्रधानमन्त्री, उहाँको सचिवालय र प्रधानमन्त्री तथा मन्त्रिपरिषद्को कार्यालयको संलग्नता नरहेको स्पष्ट पारेकी छन्।
सामाजिक सञ्जालमार्फत धारणा सार्वजनिक गर्दै उनले घटनाबारे प्रधानमन्त्री र उनको सचिवालयलाई पूर्वजानकारीसमेत नभएको बताइन् ।घटनाबारे जानकारी पाएलगत्तै प्रधानमन्त्रीले पक्राउ परेका पत्रकारलाई तत्काल रिहा गर्न तथा सञ्चारमाध्यमका समाचार कक्षमा प्रवेश गरी धरपकड नगर्न सम्बन्धित निकायलाई निर्देशन दिइसक्नुभएको दाहालले उल्लेख गरिन् ।
यसैबीच, जनआस्था अनलाइनका अनुसार नेपाल प्रेसमा कार्यरत पत्रकार विश्वमणि सुवेदीलाई प्रहरीले बानेश्वरस्थित कार्यालयबाटै पक्राउ गरेको छ । नेपाल प्रेसले केही दिनअघि आइजीपी दानबहादुर कार्कीलाई सरकारले हटाउन लागेको समाचार प्रकाशन गरेको थियो ।
यस्तै नयाँ पत्रिकाको कार्यालयमा पनि विनाबर्दीको प्रहरी टोली पुगेको छ । संवाददाता नवराज मैनालीलाई खोजिरहेको नयाँ पत्रिकाले जनाएको छ ।
नयाँ पत्रिकाले हिजो मैनालीको बाइलाइनमा बिचौलिया इनाम सापकोटा र न्यायालयबीच आर्थिक कनेक्सनको समाचार प्रकाशन गरेको थियो ।
इनम-न्यायालय कनेक्सनको समाचार लेखेको दियो पोस्ट अनलाइनको अनामनगरस्थित कार्यालयमा पनि सादा पोसाकका प्रहरी पुगेको बुझिएको छ । आजै प्रहरीले पत्रकार शोभराज बराललाई पनि पक्राउ गरेको थियो । प्रहरी प्रमुख हटाउने चलखेलबारे समाचार लेखेका ५ जना पत्रकारलाई समात्ने योजनामा प्रहरी रहेको जनआस्थाले उल्लेख गरेको छ ।
