नेपाल प्रिमियर लिग (एनपिएल) क्रिकेटमा काठमाण्डौँ गुर्खाज र कर्णाली याक्सको खेल जारी रहेको छ ।
कीर्तिपुरस्थित त्रिवि क्रिकेट मैदानमा जारी खेलमा टस हारेर ब्याटिङको निम्तो पाएको कर्णालीले काठमाण्डौँसामू १ सय ५० रनको लक्ष्य दिएको छ ।
कर्णालीले निर्धारित २० ओभरमा ५ विकेट गुमाएर १ सय ४९ रन बनायो । कर्णालीका ओपनर शिखर धवनले ७२ रनको अर्धशतकीय पारी खेले । एनपीएलमा धवनको यो पहिलो अर्धशतक हो । यस्तै, चाल्डिक वाल्टनले २१, जिशान मक्सुद १४, बाबर हायत १३ तथा गुलशन झाले १२ रन जोडे ।
काठमाण्डौँका लागि जेहार्ड एरास्मसले २ तथा नाथन स्वटर, दीपेश कँडेल र करण केसीले एक–एक विकेट लिए ।
यसअघि एकएक खेल खेलेका कर्णाली र काठमाण्डौँ दुवै टिम जितबिहीन छन्। दुवै टोली पहिलो जितको खोजीमा छन्।
कर्णाली पहिलो खेलमा जनकपुरसँग आठ विकेटले पराजित हुँदा काठमाण्डौँ पहिलो खेलमा चितवनसँग पाँच विकेटले पराजित भएको थियो ।
