सुर्खेत, पुस १५ :
कर्णालीका नौ जिल्लामा गुणस्तर परीक्षण प्रयोगशाला स्थापना हुने भएका छन् ।
चालु आर्थिक वर्षभित्रमा ती जिल्लामा प्रयोगशाला स्थापना गरिने भौतिक पूर्वाधार तथा सहरी विकास मन्त्रालयका सूचना अधिकारी प्रविण कार्कीले बताउनुभयो ।
प्रयोगशाला सञ्चालन गर्न नौ जन प्रयोगशाला प्राविधिकको दरबन्दी सृजना गरेर प्रक्रिया प्रारम्भ भएको उहाँले जानकारी दिनुभयो । प्रदेश राजधानी सुर्खेतमा आर्थिक वर्ष २०७९- ०८० मा प्रयोगशाला स्थापना भइसकेको छ ।
हाल उक्त प्रयोगशालाले कर्णालीका सबै जिल्लाको काम गर्दै आएको छ । वार्षिक २० लाख आम्दानी पनि भएको उहाँले बताउनुभयो ।
प्रयोगशालामा बालुवा, सिमेन्ट, गिट्टी लगायत निर्माण सामग्रीको गुणस्तर परीक्षण हुनेछ । ढलान भएका संरचना, कालोपत्र गरिएका सडक, ढलान हुनुअघिको ‘बेस’ र ‘सव- बेस’को ‘डेन्सिटी’ परीक्षण पनि हुनेछ ।
