लस एन्जलसको डढेलो : अझै नियन्त्रणमा आएन, मृतकको संख्या १६ पुग्यो

अमेरिकाको लस एन्जलसमा भएको डढेलोमा हालसम्म १६ जनाको मृत्यु भइसकेको छ । यहाँको मेडिकल परीक्षकको कार्यालयले यसको पुष्टि गरेको छ ।

इटन आगलागीमा ११ जनाको मृत्यु भयो भने प्यालिसेड्स आगलागीमा अन्य पाँच जनाको मृत्यु भएको अन्तर्राष्ट्रिय सञ्चारमाध्यमहरुले जनाएका छन् । अधिकारीहरूले मृत्यु हुनेको संख्या अझै बढ्न सक्ने जनाएका छन् ।

पालिसेड्समा लागेको डढेलोले लगभग २१ हजार एकड क्षेत्रफललाई असर गरेको छ । अहिलेसम्म, अग्निनियन्त्रकहरूले यहाँ लगभग ८ प्रतिशत आगो नियन्त्रणमा लिएका छन् ।

आगलागीबाट इटन दोस्रो सबैभन्दा बढी प्रभावित क्षेत्र हो । यहाँ आगलागीबाट करिब १४ हजार एकड क्षेत्रफल नष्ट भएको छ ।

लस एन्जलसका आगलागी भएका क्षेत्रहरूमा पालिसेड्स, इटन, हर्स्ट, लिडिया, आर्चर र केनेथ पर्छन् । -बीबीसी