राष्ट्रिय सभामा नेकपा एमोलकी सांसद सुमित्रा बीसीले सरकारप्रति शंका नगर्न आग्रह गरेकी छन् । राष्ट्रिय सभा बैठकमा आइतबार उनले सरकार जनताको पक्षमा काम गरिरहेको बताएकी हुन् ।
उनले अध्यादेशका बारेमा धेरै कुराहरु उठेको उल्लेख गर्दै सरकारले संसद सुरु हुनु पहिला वा संसद्को अन्त्य हुनेबित्तिकै अध्यादेश ल्याउने कुरामा प्रश्न गर्न नहुने बताइन् । उनले सरकारले आवश्यक परेको समयमा अध्यादेश ल्याउनसक्ने व्यवस्था संविधानले दिएको बताइन् ।
‘अध्यादेशका बारेमा धेरै कुराहरु उठे । शुरुवातमा ल्याउने की अन्तिम भइसकेपछि ल्याउने भन्नेकुराहरु उठ्यो । यो संविधानको ११४ को धाराअनुसार संविधानले सरकारले अध्यादेश ल्याउन पाउने अधिकार दिएको छ उनले भनिन्, त्यो अधिकारलाई प्रयोग गरेर सरकारले आवश्यकता अनुसार ल्याएको अध्यादेशलाई जनताको पक्षमा हुनेछ । यसका बारेमा शंका नगर्न आग्रह गर्दछु । शहीदको बलिदानबाट आएको सरकार हो यो । यसले शोषित र पीडित जनताको पक्षमा काम गर्नेछ । यो सरकारप्रति शंका नगर्न आग्रह गर्दछु ।’
उनले विधेयक वा अध्यादेशबाट बनाइएका कानुनहरु जनताको पक्षमा हुनुपर्ने बताइन् । सरकारले शोषित र पीडित जनताको पक्षमा काम गर्ने उनको भनाइ छ ।
