काठमाडौं, फागुन १६ :
काठमाडौंको सुकेधारास्थित धोबीखोला करिडोर नजिक एकजना व्यक्तिको शव भेटिएको छ । धोबीखोला करिडोरको धनयन्तरी फुटसलनजिकै ओलखढुंगा स्थायी घर भएका ५० वर्षीय अड्वीर राईको शव भेटिएको जिल्ला प्रहरी परिसर काठमाडौंले जनाएको छ । प्रहरीले उनको शव परीक्षणका लागि त्रिवि शिक्षण अस्पताल महाराजगन्ज पठाएको छ ।
राईको मृत्यु शंकास्पद देखिएपछि उपत्यका अपराध अनुसन्धान कार्यालयको टोलीले सीसीटीभी फुटेजलगायता अन्य पक्षबाट अनुसन्धान थालेको छ । मृतक राईको टाउकोमा गहिरो चोटहरु देखिएका छन् ।
पुरानो शौचालयमा फोहोरले छोपेको अवस्थामा शव भेटिएको कार्यालयका प्रहरी वरिष्ठ उपरीक्षक (एसएसपी) रमेश बस्नेतले बताए । शव परीक्षणपछि नै मृत्युको कारण खुल्ने प्रहरीले जनाएको छ ।
