जनता समाजवादी पार्टी नेपालका अध्यक्ष उपेन्द्र यादवले सरकारले भूमि अध्यादेश फिर्ता लिनुपर्ने सुझाएका छन् । उनले अध्यादेश फिर्ता नभए आफू र आफ्नो पार्टी जनतातर्फ फर्किने र जनआन्दोलनको बाटो पक्रिने चेतावनीसमेत दिएका छन् ।
काठमाडौंमा शुक्रबार आयोजित अध्यादेशबारे विज्ञसँगको छलफलका क्रममा उनले सांसदहरू खरिदब्रिकी गरेर भूमि अध्यादेश फिर्ता गराउनेतिर सरकार गए आफूहरू जनतातिर फर्कने बताएका हुन् ।
‘सरकारले यो भूमि अध्यादेश फिर्ता लिओस् । होइन, सांसद खरिद-बिक्री गरेर यो पास गराउँछ भने हामी जनताकोमा जान्छौं । जनआन्दोलनको बाटो पक्रन्छौं । यो स्पष्ट भए हुन्छ,’ अध्यक्ष यादवले चेतावनी दिँदै भने ।
उनले सुकुमबासीको समस्या पहिचान गरेर सधैंका लागि समाधान गर्नुपर्ने धारणा पनि राखे । सरकारले ल्याएको भूमिसम्बन्धी अध्यादेश सुकुम्बासीका नाममा भूमाफिया र जग्गा दलालहरूले पोस्न ल्याएको यादवको दाबी छ ।
‘धेरैवटा अध्यादेश विगतमा सरकारले फिर्ता लिएका छन्,’ उनले भने, ‘सुकुमबासी भूमिहीनको पहिचान गरौं, समस्या समाधान कसरी गर्ने विज्ञ राखेर बहस गरौं । वैज्ञानिक बाटो अपनाएर सधैंका लागि समस्या समाधान गरौं ।’ अध्यक्ष यादवले सुकुम्बासीका नाममा बिचौलिया, रियलस्टेटवालाले महत्त्वपूर्ण जग्गाहरू हडप्ने योजनाअनुसार सरकारले अध्यादेश ल्याएको दाबी पनि गरे ।
