स्वास्थ्य तथा जनसंख्यामन्त्री प्रदीप पौडेल र नेपाल प्रहरीका महानिरीक्षक वसन्तबहादुर कुँवरको उपस्थितिमा चिकित्सा विज्ञान राष्ट्रिय प्रतिष्ठान न्याम्ससँग नेपाल प्रहरी अस्पतालमा स्नातकोत्तर चिकित्सा विद्यार्थी अध्ययन संख्या वृद्धिसम्बन्धी सम्झौता हुँदै । तस्बिर : मन्त्री पौडेलको सचिवालय
नेपाल प्रहरी अस्पतालमा स्नातकोत्तर (पीजी) अध्ययन गर्ने चिकित्सक तथा नर्सको कोटा थपिएको छ । चिकित्सा अध्ययन प्रतिष्ठान न्याम्स र नेपाल प्रहरी अस्पतालबीच यस सम्बन्धमा सम्झौता भएको छ ।
हाल १२७ जनाले चिकित्सक तथा नर्सिङमा पीजी अध्ययन गर्दै आइरहेकामा आवश्यक फ्याकल्टी थप गर्न दुई पक्षबीच सम्झौता भएपछि अब यो संख्या २५० पुग्ने भएको छ ।
सहकुलपति स्वास्थ्य तथा जनसंख्यामन्त्री प्रदीप पौडेल अध्यक्षताको न्याम्स कार्यकारी बैठकले हालै यससम्बन्धी निर्णय गरेको थियो । सोही आधारमा मंगलबार स्वास्थ्य तथा जनसंख्या मन्त्रालयमा यससम्बन्धी सम्झौता भएको हो । मन्त्री पौडेलले दक्ष चिकित्सा जनशक्ति उत्पादन वृद्धि गर्न स्नातकोत्तर कोटा बढ्ने गरी फ्याकल्टी थप गर्न भने पछि न्याम्सले थप गर्ने निर्णय गरेको थियो ।
अब सम्झौताअनुसार न्याम्सले नेपाल प्रहरी अस्पतालमा फ्याकल्टी थपको अनुमति दिएको छ । अस्पतालको विकासमा समेत सघाउने न्याम्सले सम्झौता गरेको छ ।
प्रहरी अस्पतालले भने रेजिडेन्टलाई चिकित्सा विद्यार्थीलाई सरकारी नियमानुसार भत्ता उपलब्ध गराउने सम्झौता गरेको छ । सम्झौतामा नेपाल प्रहरी अस्पतालका तर्फबाट मेडिकल निर्देशक एआईजी डा. सुन्दरप्रसाद ह्योजु तथा न्याम्सका तर्फबाट रेक्टर प्रा.डा. लोचन कार्कीले हस्ताक्षर गरेका थिए ।
सम्झौताका लागि आयोजित कार्यक्रममा स्वास्थ्य तथा जनसंख्यामन्त्री प्रदीप पौडेलले देशमै दक्ष चिकित्सकको अभाव पूर्ति गर्न विद्यार्थी कोटा थप गर्ने गरी निर्णय भएकामा हालसम्म चार सय पीजी विद्यार्थी थप अध्ययन गर्ने वातावरण बनेको बताए । सम्झौताले थप दक्ष चिकित्सक उत्पादन हुने वातावरण तयार पार्ने उनले विश्वास व्यक्त गरे ।
कार्यक्रममा प्रहरी महानिरीक्षक वसन्तबहादुर कुँवर तथा न्याम्सका उपकुलपति प्रा.डा. भुपेन्द्र बस्नेतलगायत उपस्थित थिए ।
