प्रधानमन्त्री केपी ओलीले गणतन्त्र पक्षधरको बैठक आह्वान गरेका छन् । आज साँझ ७ बजे सिंहदरबारमा बस्ने गरी बैठक आह्वान गरेका हुन् । राजावादीहरुले गणतन्त्र मासेर पुनः राजतन्त्र फर्काउन आन्दोलन चर्काउन थालेपछि प्रधानमन्त्रीले यो बैठक डाकेका हुन् ।
राजावादीको प्रदर्शनपछि आफूलाई लोकतान्त्रिक गणतन्त्रवादी पार्टी भन्ने दलहरुले प्रतिगमनलाई परास्त गर्न सबै मिल्नुको विकल्प नभएको बताउँदै आएका छन् । बैठकमा सत्तापक्ष र प्रतिपक्ष दलले गणतन्त्रको रक्षाका लागि एकजुट भइ अगाडि बढ्न प्रतिबद्ध हुने बुझिएको छ । शुक्रबारको प्रदर्शनमा राजावादीहरुले विध्वंश मच्चाएका थिए । निजी तथा सरकारी सम्पत्तिमा आगजनी गरी क्षति पुर्याएका थिए ।
प्रधानमन्त्री ओलीले सर्वदलीय बैठकमा सहभागी हुन र संसद बैठक खुलाउने विषयमा प्रमुख विपक्षी दलका नेता पुष्पकमल दाहाललाई टेलिफोन गरेको एमाले मुख्य सचेतक महेशकुमार बर्तौलाले जनकारी दिएका छन् । प्रधानमन्त्रीले भोलि १८ गतेको संसद् बैठकमा सम्बोधन गर्ने कार्यक्रम तय भएको छ ।
