मधेस प्रदेशमा अहिले पनि छुवाछूत, दाइजो, बोक्सीजस्ता विभेदयुक्त प्रथा कायमै रहेको भन्दै प्रधानमन्त्री केपी ओलीले चिन्ता जनाएका छन् ।
मधेस प्रदेश सभामा आज (मंगलबार) उनले सम्बोधनका क्रममा मधेसमा जारी विभेदयुक्त प्रथाको अन्त्यका लागि जनचेतना फैलाउन आवश्यक रहेको पनि जनाए । प्रधानमन्त्री ओलीले मधेसमा अझै पनि छुवाछूत र विभेद रहेको भन्दै जनचेतना जगाउन आग्रह गरेका हुन् । प्रतिप्रश्न गर्दै उनले भने, ‘अन्यत्र कतै नहुने हाम्रोमा मात्र छुवाछूत किन हुन्छ ?’
प्रधानमन्त्री ओलीले अहिले पनि दाइजोका नाममा मधेसमा बेहुलाले मण्डप बहिष्कार गर्ने गरेकामा चिन्ता जनाए । उनले भने, ‘विवाहको मण्डपबाट केटो हिँड्ने, मोटरसाइकल दाइजो पाइँन भनेर जीवनसाथी छाडेर हिँड्छ । यस्तो कूचलन हटाऔं ।’
उनले २१औं शताब्दीमा पनि बोक्सीका नाममा अन्धविश्वास रहेकामा चिन्ता जनाए । ‘अहिले पनि बोक्सीको कुरा आउँछन् । यदि बोक्सी हुन्थ्यो भने युद्ध किन हुन्थ्यो ? हतियार किन चाहिन्थ्यो ? त्यस्तो केही छ भने मलाई गाली गर्नुको सट्टा बोक्सी लगाइदिए भयो नि,’ प्रधानमन्त्री ओलीले भने, ‘यस्तो अन्धविश्वासको कुरा हुनेछ ? क नपढेको व्यक्तिले विनाधनुष, विनातीर हावामा वाण हान्दिने कुरा हुन्छ ?’
यो पनि :
संविधानमा उचित संशोधनका लागि समिति बनाएर काम गर्छौं : प्रधानमन्त्री
‘जनतालाई पवित्रभावका साथ सेवा दिएर लोकतन्त्रलाई बलियो बनाउनुपर्छ’
