नेपाली कांग्रेसका सभापति शेरबहादुर देउवाले भारतको उत्तर प्रदेशका मुख्यमन्त्री योगी आदित्यनाथसम्बन्धी आफ्नो अघिल्लो अभिव्यक्तिलाई खण्डन गरेका छन्।
शनिबार काठमाडौंमा आयोजित एक कार्यक्रममा देउवाले आफूले केही दिनअघि दिएको भनाइ गलत सूचनाको आधारमा भएको स्वीकार गर्दै त्यसको स्पष्टीकरण दिएका हुन्।
अघिल्लो कार्यक्रममा देउवाले मुख्यमन्त्री आदित्यनाथले दिल्लीस्थित नेपाली दूतावासमा गई ‘नेपालमा राजतन्त्रको पक्षमा छैन’ भन्ने अभिव्यक्ति दिएको दाबी गरेका थिए।
तर, पछिल्लो कार्यक्रममा उनले उक्त दाबी सत्य नभएको बताए। ‘मैले बोल्दा गलत सूचनाको आधारमा भारतका उत्तर प्रदेशका मुख्यमन्त्रीको विषयमा बोलेछु,’ देउवाले भने, ‘उहाँ दूतावासमा आउनुभएको होइन, बरु भारतका लागि नेपाली राजदूत शंकरप्रसाद शर्माले उहाँलाई भेट्नुभएको हो।’
देउवाले आदित्यनाथले ‘नेपालमा राजाको पक्षमा छैन’ भनेको भन्ने हल्लालाई समेत खारेज गरे। "हामी नेपालमा राजाको पक्षमा छैनौँ, यो बेकारको हल्ला हो," उनले स्पष्ट पारे, ‘मेरो फोटो छापे पनि त्यो होइन। यो पनि म खण्डन गर्न चाहन्छु।’
त्यसैगरी, देउवाले हालको सरकारको कामकारबाहीप्रति पनि चिन्ता व्यक्त गरे। अघिल्लो वक्ता डा. शेखर कोइरालाले सरकारप्रतिको आलोचना उल्लेख गरेपछि देउवाले भने, ‘सरकारको नाममा अहिले धेरै ठूलो बदनामी भइरहेको छ, यो हुन नदिऊँ भन्ने चाहन्छु।’
