चितवन, वैशाख ३ :
नेकपा माओवादी केन्द्रका अध्यक्ष पुष्पकमल दाहालले आज (बुधबार) धार्मिक पर्यटकीय क्षेत्र त्रिवेणीको अवलोकन गरेका छन् ।
हुलाकी लोकमार्ग केन्द्रित जनतासँग माओवादी तराई-मधेस जागरण अभियानअन्तर्गत दाहालले त्रिवेणी धामको अवलोकन भ्रमण गरेका हुन् ।
धार्मिक तथा पर्यटकीय दृष्टिले महत्त्वपूर्ण स्थल त्रिवेणीको प्रवर्धन र विकासका उद्देश्यले दाहालले यस क्षेत्रको अवलोकन गरेको उनको सचिवालयले जनाएको छ ।
दाहालले त्रिवेणीको धार्मिक, ऐतिहासिक र पर्यटकीय सम्भावनालाई उजागर गर्न आवश्यक रहेको भन्दै यहाँको विकासमा हातेमालोका लागि आह्वान पनि गरेका छन् । उनले यहाँका आवश्यकता र समस्याबारे चासो राखेका थिए ।
यस क्षेत्रको धार्मिक पर्यटन प्रवर्धनमार्फत स्थानीय आर्थिक विकासमा टेवा पुग्ने विश्वास अध्यक्ष दाहालले व्यक्त गरे ।
