नेकपा माओवादी केन्द्रका अध्यक्ष पुष्पकमल दाहाल कपिलवस्तुको शुद्धोधन गाउँपालिका ४ मा रहेको नेपाल राष्ट्रिय नमुना माध्यमिक विद्यालय (प्रस्तावित कन्या कलेज) पुगेर विद्यार्थी, अभिभावक तथा स्थानीय बासिन्दासँग अन्तर्क्रिया गरेका छन् ।
मुस्लिम, थारू र मधेसी समुदायका छात्रालक्षित यो कलेज कपिलवस्तुको दक्षिणी भेकमा छ । महिला हिंसा र सामाजिक सुरक्षाको डरका कारण शिक्षाबाट वञ्चित हुँदै आएका छात्राहरूका लागि यो कलेज महत्त्वपूर्ण अवसरका रूपमा हेरिएको छ ।
हाल कक्षा १२ सम्म मात्र पठनपाठन हुने यस विद्यालयमा भविष्यमा स्नातक तह (ब्याचलर) अध्ययनको व्यवस्था मिलाउने योजना छ । साथै छात्राहरूको विद्यालय आवागमन सहज बनाउन कलेज बसको आवश्यकता रहेको विषयमा पनि छलफल भएको छ ।
अध्यक्ष दाहालले यस विद्यालयलाई एक वास्तविक कलेजका रूपमा सञ्चालन गर्दै सामाजिक समावेशीता र लैङ्गिक समानताको नमुना केन्द्रका रूपमा विकास गर्न सहयोग गर्ने प्रतिबद्धता जनाए । साथै उनले बसको व्यवस्थाका लागि आवश्यक पहल गर्ने आश्वासन पनि दिए ।
