नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपाल लागू औषध दुर्व्यसनीविरुद्ध युवा तथा विद्यार्थीहरू जाग्न आवश्यक रहेको बताउनुभएको छ ।
दोलखामा रहेको गाईखुरा युवा क्लबले आज काठमाडौँमा गरेको लागू औषध दुर्व्यसन विरुद्ध सचेतना कार्यक्रममा अध्यक्ष नेपालले लागू औषध दुर्व्यसन तथा कुलतबाट जोगाउनका लागि युवा एवं विद्यार्थीको भूमिका महत्वपूर्ण हुने बताउनुभयो ।
पछिल्लो समय लागू औषध दुर्व्यसनमा धेरैजसो युवा पुस्ता फस्दै गएको भन्दै उहाँले त्यसविरुद्ध विद्यालय र क्याम्पसमा अध्ययनरत विद्यार्थी र सामाजिक क्षेत्रमा सक्रिय युवाहरू सचेतना अभियान सहित जाग्नुपर्ने बेला आएको बताउनुभयो ।
उहाँले लागू औषध दुर्व्यसनको सञ्जाल नै खडा गरी व्यापार गर्नेलाई समाजबाट नै बहिष्कार गर्नुपर्ने आवश्यक रहेको बताउनुभयो । यसका लागि कठोर कानून आवश्यक रहेको उहाँको भनाइ थियो ।
