फाइल तस्बिर।
सरकारले पटक-पटक ताकेता गर्दा पनि फेसबुक, इन्स्टाग्राम, एक्स (पहिलेको ट्विटर), युट्युब, टेलिग्राम, लिङ्कडइनजस्ता ठुला सामाजिक सञ्जालहरूले नेपालमा आफूलाई दर्ता (सूचीकृत) गराएका छैनन्।
नेपालमा ४० भन्दा बढी सामाजिक सञ्जाल चलिरहेका छन् तर अहिले भाइबर, विइटक, टिकटक र निम्बज मात्रै सरकारमा सूचीकृत भएका छन्। सरकारले २०८० सालमा नियम बनाएर तीन महिनाभित्र दर्ता हुन भनेको थियो। तर अहिलेसम्म धेरैजसो सञ्जालले सरकारको कुरा मानेका छैनन्।
सञ्चार मन्त्रालयका अनुसार सामाजिक सञ्जालहरूलाई नियममा ल्याउनका लागि पटक–पटक सूचना निकालेर दर्ता हुन आग्रह गरिएको छ। मेटा कम्पनीलाई (फेसबुक चलाउने कम्पनी) दुई पटक इमेल पठाइएको र एक पटक अनलाइन बैठकसमेत भएको भए पनि हालसम्म कुनै ठोस जवाफ आएको छैन।
सञ्चारमन्त्री पृथ्वी सुब्बा गुरुङले अराजक रूपमा प्रयोग हुने सामाजिक सञ्जालमा अब कडाइ गर्ने चेतावनी दिएका छन्। मन्त्रालयले सामाजिक सञ्जाल बन्द गर्न नभई नियमित गर्न खोजेको भन्दै सबैलाई नियमअनुसार दर्ता हुन अनुरोध गरेको छ। अब पनि दर्ता नभए कानुनअनुसार कारबाही गरिने बताइएको छ।
