काठमाडौं, जेठ १५ :
पूर्वराज्यमन्त्री तथा नेपाली कांग्रेस नेता गणेशबहादुर खड्काको बिहीबार ८३ वर्षको उमेरमा निधन भएको छ ।
लामो समयदेखि क्यान्सबाट पीडित खड्काको बिहीबार दैलेखको नारायण नगरपालिकास्थित आफ्नै निवासमा निधन भएको हो । काठमाडौंबाट उपचारपछि एक साताअघि उनलाई घर लगिएको थियो ।
दैलेख निर्वाचन क्षेत्र नम्बर १ बाट तीनपटक निर्वाचित खड्का २०४८ र २०५१ मा प्रतिनिधिसभा सदस्यमा निर्वाचित भएका थिए भने २०६४ मा संविधानसभा सदस्यमा निर्वाचित भएका थिए ।
नेपाली कांग्रेस दैलेखका संस्थापक नेतासमेत रहेका खड्का २०५१ मा सहायकमन्त्री र २०६६ मा राज्यमन्त्री बनेका थिए । २०२५ सालदेखि राजनीतिमा सक्रिय खड्का २०२७ देखि २०३० सम्मका पार्टीको जिल्ला उपसभापति र २०३३ देखि २०४८ सम्म सभापति थिए ।
