राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले सरकार राजसंस्था समर्थकहरूको आन्दोलनसँग डराएको टिप्पणी गरेका छन्।
पार्टीको केन्द्रीय कार्य सम्पादन समितिको शनिबार बसेको बैठकपछि सञ्चारकर्मीहरूसँग उनले निषेधित क्षेत्र घोषणा गर्नु सरकारको कमजोरीको संकेत भएको दाबी गरे।
उनले भने, ‘हिजोसम्म निषेधित क्षेत्र नभएको स्थानलाई प्रदर्शनको अड्कलबाजीमै निषेधित घोषणा गर्नु सरकार कमजोर भएको प्रमाण हो।”
लिङ्देनले राजधानीमा भएको दुई दिने प्रदर्शनको प्रभावले सरकारले डराएर नारायणहिटी आसपास निषेधित क्षेत्र बनाएको तर्क गरे। उनले गणतन्त्र झनै कमजोर हुँदै गएको दाबीसमेत गरे।
उनका अनुसार बैठकमा आन्दोलन उत्साहजनक रहेको निष्कर्ष निकाल्दै आगामी कार्यक्रम थप सशक्त बनाउने निर्णय गरिएको छ। आन्दोलन समितिको निर्देशनमा सबै संरचना परिचालन गरिने पनि उनले बताए।
राप्रपाले जेठ १५ र १६ गते काठमाडौँमा राजसंस्था र हिन्दुराष्ट्रको समर्थनमा प्रदर्शन गरेको थियो। त्यसपछि जेठ १६ मा काठमाडौं प्रशासनले नारायणहिटी आसपास निषेधित क्षेत्र घोषणा गरेको हो।
