उच्च अदालत पोखराको बागलुङ इजलासले इमेज सहकारीका संस्थापक अध्यक्ष देवकुमार नेपालीको नाममा रहेको घरजग्गा लिलामी नगर्न अल्पकालीन अन्तरिम आदेश जारी गरेको छ। राष्ट्रिय सहकारी बैंक ललितपुरको नाममा लिलामीको प्रक्रिया अघि बढेकोमा नेपालीले अदालतमा निवेदन दर्ता गरेका थिए।
न्यायाधीश नातिबाबु लामिछानेको एकल इजलासले बुधवार लिलामी तत्काल रोक्न आदेश दिए पनि अन्तरिम आदेशका लागि दुवै पक्षको बहसपछि निर्णय हुने जनाइएको छ। यसका लागि विपक्षीलाई २०८२ असार ९ गते अदालतमा उपस्थित हुन म्याद सूचना जारी गरिएको छ।
बागलुङ–२ हल्लनचोकस्थित कित्ता नं. ४५७, ४५८, ४५९ र ८८७ मा रहेका घरजग्गा राष्ट्रिय सहकारी बैंकले डेढ वर्षअघिदेखिको प्रक्रियाबाट लिलामीमा राखेको थियो। ती सम्पत्ति रामबहादुर र गोमा क्षेत्रीले झन्डै २०/२१ करोडमा खरिद गरेका थिए, जबकि वास्तविक मूल्य झन्डै एक अर्ब पर्ने पीडितहरुको दाबी छ।
तीन वर्षदेखि आन्दोलनरत पीडितहरुले जानकारी नदिई सस्तो मूल्यमा लिलामी गरी आफूहरूलाई रकम फिर्ता पाउने अवसरबाट बञ्चित गरिएको गुनासो गरेका छन्। अध्यक्ष नेपाली २०८० जेठ ४ गतेदेखि फरार भएपछि २०८० असार २५ मा उनीविरुद्ध मुद्दा दायर गरिएको थियो। हाल उनी अदालतको आदेशमा थुनामा छन्।
