काठमाडौं, जेठ ३० :
रुपन्देही कारागारमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीलाई मानव तस्करीविरुद्धको संघर्षबाट पछि नहट्न निर्देशन दिएका छन्।
पार्टी नेताहरूमार्फत पठाएको सन्देशमा उनले भिजिट भिसाका नाममा हुने तस्करी गम्भीर विषय भएको बताउँदै, ‘बरु म कारागारमै बस्न तयार छु, तर कुनै बार्गेनिङ नगर्नू,’ भनेका छन्।
उनका स्वकीय सचिव अविनाश आचार्यका अनुसार, लामिछानेले सरकार गम्भीर नहुँदा यो विषयले राष्ट्रिय सुरक्षामै प्रश्न उठाएको बताए।
रास्वपाले हाल त्रिभुवन विमानस्थलमार्फत हुने मानव तस्करीमा गृहमन्त्री रमेश लेखकको संलग्नता रहेको दाबी गर्दै, उनी राजीनामा नदिए र छानबिन समिति नबनेसम्म संसद् चल्न नदिने अडान लिएको छ। यही कारण जेठ १३ यता संसद् अवरुद्ध छ।
