समसामयिक राजनीतिक विषयमा छलफल गर्न नेकपा एमालेका अध्यक्ष एवं प्रधानमन्त्री केपी ओलीसहित प्रमुख तीन दलका शीर्ष नेताको बैठक बस्दै छ ।
प्रधानमन्त्री तथा मन्त्रिरिषद्को कार्यालय सिंहदरबारमा आज (शुक्रबार) दिउँसो २ बजे बस्ने बैठकमा नेपाली कांग्रेसका सभापति एवं पूर्वप्रधानमन्त्री शेरबहादुर देउवा, नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल सहभागी हुनेछन् ।
हिजो (बिहीबार), अस्ति (बुधबार) का लागि पनि तीन दलका शीर्ष नेतृत्वबीच छलफल हुने भनिए पनि भेट हुन सकेको थिएन । बुधबार बस्ने भनिएको बैठक माओवादी अध्यक्ष राजधानी बाहिर भएकाले बिहीबार सारिएको थियो । बिहीबार बस्ने भनिएको बैठक अन्तिम समयमा आएर ‘विशेष कारणवश’ भनेर स्थगित गरिएको थियो ।
छलफलका विषयवस्तुहरु भने सार्वजनिक गरिएका छैनन् ।
प्रधानमन्त्री ओलीको सचिवालयका अनुसार उनी अहिले प्रतिनिधिसभामा सांसदहरुको प्रश्नको जवाफका लागि जानेछन् भने अपराह्न ४ बजे उनी ललितपुरको ग्वार्कोमा बनेको फ्लाइओभरको उद्घाटन गर्ने कार्यक्रममा सहभागी हुनेछन् ।
-फाइल तस्बिर
