प्रधानमन्त्री केपी ओलीसँग सुर्खेतबाट खाली खुट्टा हिँडेर काठमाडौंसम्मको यात्रा पूरा गरेका अभियानकर्मी नवराज बोहोराले बालुवाटारमा आइतबार भेट गरेका छन् ।
कर्णालीको सुशासन, विकास, पर्यावरणीय सन्तुलन र पशु संरक्षणलगायत मुद्दा उठाएर गत जेठ ४ गतेदेखि यात्रा सुरु गरेका बोहोरा ३१औं दिनमा असार ३ गते काठमाडौं आइपुगेका थिए । सोही दिन प्रधानमन्त्री ओलीलाई भेट्न खोजेका बोहोराले कार्यव्यस्तताका कारण आइतबार भेट्न पाएको प्रधानमन्त्रीको सचिवालयले जनाएको छ ।
बोहोराले प्रधानमन्त्री ओलीलाई आफूले अभियान र यात्राका क्रममा देखेका अनुभव, उपचार नपाएका बालबालिका आदिका समस्या र समस्या समाधानका लागि गरिएका पहलबारे जानकारी गराए । ओलीले पवित्र भावका साथ अभियान सञ्चालन गर्न सुझाए । उनले शरीरलाई धेरै दुःख नदिइ आफ्नो स्वास्थ्य र परिवारको पनि ख्याल गरेर अघि बढ्न आग्रह गरे ।
ओलीसँग भेटेपछि बोहोराले आफ्ना कुरा सुनाउन पाएकामा खुसी जनाए । उनले पहिलो चरणको अभियान पूरा भएकाले अब जुत्ता लगाउने, दाह्री काटेर नयाँ स्वरुपमा अघि बढ्ने पनि बताए ।
