नेकपा माओवादी केन्द्रका अध्यक्ष पुष्पकमल दाहालले वाईसीएल नेपालले नीतिगत निर्णयमार्फत राष्ट्रिय रूपमा सञ्चालनमा ल्याएको श्रम अभियानलाई आफ्नो पार्टीले अघि सारेको बताएका छन् । उनले ‘उत्पादन ब्रिगेड’ को निरन्तरता र एक महत्त्वपूर्ण आयाम भएको पनि उल्लेख गरे ।
‘सर्वसम्मत रूपमा केन्द्रीय समिति गठन भइसकेपछिको पहिलो पदाधिकारी बैठकमा, उत्पादन र राष्ट्रिय अर्थतन्त्र निर्माणमा पार्टी र वाईसीएलले अग्रणी भूमिका खेल्नुपर्ने निर्देशन मैले दिएको थिएँ । त्यसैअनुसार देशैभरि यस्ता कार्यक्रम सञ्चालन गर्ने निर्णय गरिएको छ,’ उनले भने, ‘यो अभियान माओवादी आन्दोलनको वैचारिक र व्यवहारिक गहिराइसँग जोडिएको विषय हो । यसका लागि म वाईसीएललाई धन्यवाद दिन चाहन्छु ।’
दाहालले ललितपुरको बालकुमारी चौर सुनाकोठीमा आयोजित विशेष कार्यक्रममार्फत ‘श्रम र उत्पादनमा वाईसीएल अभियान’ को बिहीबार औपचारिक उद्घाटन गरे । त्यसअवसरमा उनी श्रममा प्रत्यक्ष सहभागी हुँदै इँटा लगाउने, घाँस काट्ने, वृक्षरोपण गर्ने, चौरको सरसफाइलगायत गतिविधिमा सहभागी बने ।
भ्रष्टाचारविरुद्ध सडक संघर्ष गर्ने दाहालको चेतावनी
कार्यक्रममा दाहालले युवालाई भ्रष्टाचारविरुद्ध सशक्त भूमिका खेल्न आह्वान गरे । संसद्मा प्रतिपक्षको हैसियतले सरकारको असफलता र भ्रष्ट्राचार उजागर गर्दै आएको उल्लेख गरे । उनले भने, ‘यदि सरकार यसरी नै भ्रष्टाचारमा लिप्त रहिरह्यो भने, हामी बाध्य भएर छिटै सडकबाटै आन्दोलन गरेर हटाउनुपर्ने हुन्छ ।’
कार्यक्रममा माओवादी केन्द्रका युवाहरूको सहभागिता थियो । वाईसीएल नेपालले देशभर ५५ ठाउँबाट अभियान सञ्चालन गरेको जानकारी दिएको छ । त्यस क्रममा दाहालले युवालाई उत्पादन, समृद्धि र स्वाभिमानी अर्थतन्त्र निर्माणको अग्रपंक्तिमा उभिन आग्रह गरे ।
