स्वास्थ्य तथा जनसंख्या मन्त्रालयबाट उपलब्ध हुने विपन्न उपचार सहायता ‘स्वास्थ्य बिमा कार्यक्रम’मार्फत उपलब्ध गराउने प्रक्रिया थालिएको छ ।
विपन्न उपचार सहायता स्वास्थ्य बिमामार्फत उपलब्ध गराउने खाका तयार पार्न स्वास्थ्यमन्त्री प्रदीप पौडेलले एउटा विज्ञ समिति बनाएका छन् । समितिलाई एक साताभित्र सुझावसहितको प्रतिवेदन दिन भनिएको छ ।
उनले यससम्बन्धमा सामाजिक सञ्जालमार्फत जानकारी दिएका हुन् । मन्त्री पौडेलले लेखेका छन्, ‘सरकारबाट प्रदान हुने विपन्न नागरिक उपचार सहायतासहितका सहुलियत स्वास्थ्य बिमा कार्यक्रममार्फत नै उपलब्ध गराउन नीतिगत सुधार गर्ने पूर्वप्रतिबद्धताअनुसार कार्यान्वयन प्रक्रिया आरम्भ गरेका छौं ।’
यसअघि आठ प्रकारका जटिल रोगका बिरामीलाई स्वास्थ्य बिमा कार्यक्रममार्फत उपचार सहायता दोब्बर गर्ने निर्णय कार्यान्वयनमा आइसकेको उल्लेख गर्दै उनले सबै उपचार सहुलियत एकीकृत ढंगबाट प्रदान हुँदा स्वास्थ्य बिमामार्फत प्राप्त हुने सुविधा थप वृद्धि हुने बताएका छन् ।
‘आमनागरिकको स्वास्थ्य उपचार पहुँच विस्तार तथा सेवा अभिवृद्धिमा हामी निरन्तर प्रयत्नशील छौं । यस व्यवस्थाले नागरिकलाई स्वास्थ्य उपचार प्राप्तिमा थप सहजता प्राप्त हुने हाम्रो विश्वास छ,’ उनले भनेका छन् ।
मन्त्री पौडेलले गत साउन २७ गते आफ्नो योजना तथा प्राथमिकता सार्वजनिक गर्ने क्रममा स्वास्थ्य बिमा कार्यक्रमलाई प्रभावकारी बनाउन सरकारले दिने उपचार सहायता स्वास्थ्य बिमामार्फत नै उपलब्ध गराउने र स्वास्थ्य बिमाको नीतिगत तथा कार्यगत सुधार गर्ने घोषणा गरेका थिए ।
यसअनुसार व्यक्तिले आफू बसेकै स्थानमार्फत स्वास्थ्य बिमाको प्रथम सेवा लिन पाउने व्यवस्था भएको छ । यसका साथै स्वास्थ्य बिमामा आवद्ध भएको तीन महिनापछि सेवा पाउने व्यवस्था परिवर्तन गरेर एक महिनाभित्रै प्राप्त गर्न सकिने बनाइएको छ ।
हरेक स्थानीय तहमा स्वास्थ्य बिमाको प्रथम सेवा विन्दुका लागि समेत नीतिगत निर्णय गरेका मन्त्री पौडेलले घोषणा गरेअनुसारका नीतिगत सुधार निरन्तर जारी राखेका छन् । स्वास्थ्य बिमा कार्यक्रमको सबै बक्यौता यसै आर्थिक वर्षमा शून्यमा झार्ने सरकारले बजेटमार्फत घोषणा गरेको छ । यसले स्वास्थ्य बिमाको भुक्तानीमा देखिएको कठिनाइसमेत समाधान हुने अपेक्षा गरिएको मन्त्रालयका प्रवक्ता डा. प्रकाश बुढाथोकीले बताए ।
सरकारी सुविधा एकीकृत रुपमा स्वास्थ्य बिमामा थपिँदा यसले कार्यक्रमको आम्दानीसमेत वृद्धि हुँदा सेवा दिन थप सहजता हुने स्वास्थ्य बिमा बोर्डका कार्यकारी निर्देशक डा. रघुराज काफ्लेले बताए ।
