नेकपा (एमाले)का स्थायी समिति सदस्य कर्ण थापाले पार्टी अध्यक्ष केपी शर्मा ओली र महासचिव शंकर पोखरेलको नाममा देशभर गुटबन्दी सञ्चालन भइरहेको आरोप लगाएका छन्।
शनिबार सामाजिक सञ्जालमार्फत आफ्नो धारणा सार्वजनिक गर्दै थापाले एमालेको दसौं महाधिवेशनपछि पार्टीभित्र गम्भीर गुटबन्दी बढेको उल्लेख गरेका छन्। उनले अध्यक्ष र महासचिवको नाम लिँदै कतिपय नेताहरूले आफ्ना स्वार्थ पूरा गर्न गुट बनाएर पार्टीको एकता कमजोर बनाउने काम गरिरहेको बताएका छन्।
थापाले पार्टी कार्यालयमै बसेर गुटलाई संरक्षण र समर्थन दिइएको भन्दै गम्भीर असन्तुष्टि जनाएका छन्। ‘कतिपय नेताहरू आफूलाई मात्र आधिकारिक ठान्छन् र अरूको योगदानको मूल्यांकन गर्दैनन्,’ उनले लेखेका छन्, ‘यस्ता प्रवृत्तिले पार्टीभित्र दोश्रो दर्जाको व्यवहार सिर्जना गरेको छ।’
उनले पार्टीभित्र जनताको बहुदलीय जनवाद (जबज) र आन्तरिक लोकतन्त्रको अभ्यास कमजोर हुँदै गएको जिकिर गरेका छन्। गुटबन्दीले पार्टीलाई विभाजित र निष्क्रिय बनाउने खतरा रहेको भन्दै उनले यस्तो अवस्था अन्त्य नगरेसम्म एमाले निर्णायक राष्ट्रिय शक्ति बन्न नसक्ने चेतावनीसमेत दिएका छन्।
