अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईविरुद्ध तीन विवादास्पद भ्रष्टाचार प्रकरणमा अनुसन्धानको माग गर्दै आयोगमै औपचारिक उजुरी दर्ता गरिएको छ। सिन्धुली कमलामाई निवासी युवराज पौडेलले आइतबार आयोगको केन्द्रीय कार्यालयमा उजुरी दर्ता गरेका हुन्।
उजुरीमा वाइडबडी विमान खरिद अनियमितता, नेपाल आयल निगमको जग्गा खरिद भ्रष्टाचार, र नक्कली भुटानी शरणार्थी प्रकरणसम्बन्धी आरोपहरू समेटिएको छ। पौडेलले राईमाथि तत्काल अनुसन्धान गरी पुरक अभियोगपत्रमार्फत मुद्दा दायर गर्न र हदैसम्मको कारबाही गर्न माग गरेका छन्।
विशेष अदालतले हालै वाइडबडी विमान खरिद प्रकरणमा निर्णय सुनाउँदै प्रारम्भिक निर्णयकर्ता व्यक्तिहरूमाथि अनुसन्धान नगरी चयनात्मक अभियोजन गरिएको भन्ने न्यायिक टिप्पणी गरेको थियो। सो क्रममा राईको नामसमेत पुनः चर्चामा आएको हो।
नेपाल आयल निगमको जग्गा खरिदमा पनि आपूर्ति मन्त्रालयका तत्कालीन सचिव तथा निगमको सञ्चालक समिति अध्यक्षको हैसियतमा राईको संलग्नता रहेको पौडेलको दाबी छ। कार्यकारी निर्देशक गोपाल खड्कामाथि मात्र कारबाही गरेर राईलाई उन्मुक्ति दिएको भन्दै उनले फाइल पुनः खोतल्न माग गरेका छन्।
पौडेलले आफ्नो उजुरीमार्फत अख्तियार प्रमुखजस्तो संवैधानिक पदमा रहेका व्यक्तिमाथि निष्पक्ष छानबिनको माग गर्दै, सबै नागरिक कानुनको दृष्टिमा समान हुनुपर्ने आधारमा अनुसन्धानको माग गरेका छन्।
