माओवादी केन्द्रका उपमहासचिव जनार्दन शर्माले विशेष महाधिवेशनमार्फत पार्टी पुनर्गठन गर्नुपर्ने प्रस्ताव अघि सारेका छन्।
पार्टीले आफूविरुद्ध गुटबन्दी र विभाजनको आरोप लगाएको भन्दै सामाजिक सञ्जालमार्फत चार बुँदे धारणा सार्वजनिक गरेका उनले पार्टीभित्र वैचारिक अस्पष्टता, राजनीतिक अन्योल र सांगठनिक अराजकता रहेको बताएका छन्।
उनले विशेष महाधिवेशनबाट नयाँ पुस्ताको भावना समेट्ने कार्ययोजना बनाउनुपर्ने बताए। सत्तापक्षसँगको दुई बुँदे सहमतिले पार्टीको साख गिरेको उल्लेख गर्दै शर्माले संविधान संशोधन, अर्थतन्त्रको पुनःसंरचना र पार्टी पुनर्गठनबाट मात्रै संकट समाधान सम्भव हुने दाबी गरेका छन्।
शर्माले कुशासन, भ्रष्टाचार र जनसरोकारका विषयमा बेवास्ताले जनतामा निराशा फैलिएको भन्दै समस्याको पहिचान र समाधानतर्फ केन्द्रित हुनुपर्ने बताएका छन्। अध्यक्ष पुष्पकमल दाहालको कार्यशैलीप्रति असन्तुष्टि जनाएसँगै माओवादी केन्द्रभित्रको आन्तरिक विवाद सतहमा आएको छ।
