इस्लामावाद, साउन १६ :
पाकिस्तानका पूर्वप्रधानमन्त्री इमरान खानको पार्टीका १०८ सदस्यलाई जेल सजाय सुनाइएको छ ।
सजाय सुनाइएकामाथि सन् २०२३ मा सेनाविरुद्धको विरोध प्रदर्शनमा सहभागी भएको आरोप छ । मे २०२३ मा सुरक्षा बलले भ्रष्टाचारको आरोपमा अदालतमा उपस्थित हुने क्रममा इमरान खानलाई पक्राउ गरेको थियो । त्यसपछि देशभर हिंसात्मक प्रदर्शन सुरु भएको थियो ।
बिहीबारको फैसलालाई इमरान खानको पार्टी पाकिस्तान तहरिक-ए-इन्साफ (पीटीआई) का लागि ठुलो झड्का मानिएको छ ।
सजाय सुनाइएकामा पाकिस्तानको राष्ट्रिय सभामा विपक्षी दलका नेता ओमर अयुब खान पनि समावेश छन् । जसलाई यसअघि नै १० वर्षको जेल सजाय सुनाइएको थियो ।
विपक्षी नेताहरूले आतंकवादविरोधी अदालतको निर्णयको निन्दा गरेका छन् । यस निर्णयमा पीटीआईका ६ सांसदलाई पनि अयोग्य घोषित गरिएको छ । -बीबीसी हिन्दी
