आदिवासी जनजाति आयोगका अध्यक्ष रामबहादुर थापा मगरले आयोगले दिएका सुझावहरु १० प्रतिशत पनि कार्यान्वयन हुन नसकेको बताएका छन् ।
विश्व आदिवासी जनजाति दिवसका अवसरमा काठमाडौंमा आयोजित एक कार्यक्रममा उनले यस्तो गुनासो गरेका हुन् । उनले संविधान र कानुनले दिएका आदिवासी जनजातिका अधिकारहरु अझै पूरा हुन नसकेको दाबी गरे । उनले आयोगले सरकारलाई सिफारिस गरे पनि १० प्रतिशत पनि सिफारिसहरु कार्यान्वनय नभएको बताए ।
आयोगले जतिसुकै काम गरे पनि परिणाम कार्यान्वयनमा हुने भएकाले कार्यान्वयनका लागि सरकारले प्राथमिकता दिनुपर्ने बताए । ‘संविधान र कानूनले दिएका आदिवासी जनजाति अधिकारहरु कार्यान्वयन छन् छैनन् त्यसबारेमा अनुगमन र सरकारलाई सिफारिस गर्ने यो क्षेत्रमा काम गर्दै आएको आदिवासी जनजाति आयोगले प्रतिवेदन सम्माननीय राष्ट्रपतिज्यूमार्फत नेपाल सरकारलाई बुझाइसकेको छ । चार प्रतिवेदनमा फोटो मात्रै टाँसेको छैन । ६ दर्जन भन्दा बढी सिफारिस गरेका छौँ । तर सरकारबाट त्यसको कार्यान्वयन भएको छैन,’ उनले भने, ‘१० प्रतिशत पनि कार्यान्वयन भएको छैन । त्यतातिर सरकार गम्भीर होस् । आयोगले जतिसुकै काम गरे पनि परिणाम कार्यान्वयनमा हुन्छ, कार्यान्वयन नगरे परिणाम देखिँदैन ।’
उनले आदिवासी जनजातिले चाहेअनुसारको पूर्ण समावेशिता अझै लागु हुन नसकेको जिकिर गरे ।
