काठमाडौं महानगरपालिकाले म्याट्रिक्स फाइट नाइट १७ (एमएफएन १७) च्याम्पियन नेपाली एमएफएन फाइटर रवीन्द्र ढाट र खोखो विश्वकपमा उपविजेता बनेको नेपालको पुरुष र महिला टोलीलाई नगद पुरस्कारसहित सम्मान गरेको छ ।
महानगरले रवीन्द्रलाई दुई लाख र खोओ विश्वकप पुरुष र महिला टोलीलाई ११/११ लाख रुपियाँ पुरस्कारसहित सम्मान गरेको हो । दुवै खेल हालै भारतमा सम्पन्न भएका हुन् ।
रवीन्द्र र खोखो टोलीलाई महानगरपालिकाका प्रमुख बालेन्द्र शाह (बालेन) उपप्रमुख सुनिता डङ्गोल, प्रमुख प्रशासकीय अधिकृत र सामाजिक विकास समितिका संयोजकलगायतले सम्मान गरेका हुन्।
एमएमए फाइटर रवीन्द्रलाई सरकारले पनि पाँच लाख पुरस्कार दिने निर्णय गरेको खेलकुदमन्त्री तेजुलाल चौधरीले जानकारी दिएका छन्। लामो समयदेखि एमएफएन फाइट खेल्दै आएका रवीन्द्र यसअघिका भारतका च्याम्पियन कोरेनलाई पराजित गरेपछि देश-विदेशमा परिचित भएका छन् ।
