सभामुख देवराज घिमिरेले सदनलाई मूल लयमा फर्काउन अपिल गरेका छन् । प्रतिनिधिसभाको शुक्रबारको बैठकमा उनले आकस्मिक समयअघि आफ्ना भनाइ राख्दै यस्तो अपिल गरेका हुन् ।
रास्वपा र राप्रपाले लगातार संसद् बहिष्कार गर्दै आएका छन् । ‘भिजिट भिसा प्रकरणको छानबिनलगायतका माग राखी लामो समयदेखि प्रतिपक्षी बेन्चमा रहेका माननीय सदस्यज्यूहरू नियमित बैठकमा सहभागी हुनुभएको छैन,’ सभामुखले भने, ‘यस सम्बन्धमा सहमतिका लागि म आफैँले सम्भाव्य सबै पहल र संवादको मार्ग अपनाएकोबारे माननीयज्यूहरू जानकार नै हुनुहुन्छ । यसका बाबजुद पनि म आज पनि सहमतिका लागि प्रयत्नशील रहेको छु । तर सदन सुचारु बनाउन सरकार र राजनीतिक दलहरूबिच हुनुपर्ने छलफल र संवाद नभएकोमा चिन्तित छु ।’
त्यस्तै उनले यसरी बैठक सुरु हुनासाथ ‘असहमति प्रदर्शन’ गर्ने र बाहिरिने प्रवृत्ति संस्थागत लोकतान्त्रिक प्रणाली र संसदीय अभ्यासका दृष्टिले दीर्घकालीन रूपमा हानिकारक साबित हुनसक्ने बताए । ‘हामी भविष्यलाई के सन्देश दिइरहेका छौं भन्ने विषयमा सबै सचेत रहनु आवश्यक छ । संसद् केवल असहमति अभिव्यक्त गर्ने स्थल मात्र होइन, राष्ट्रिय सहमतिको आवाज प्रकट गर्ने थलो पनि हो,’ घिमिरेको भनाइ छ ।
उनले सरकार, प्रतिपक्ष र सत्तापक्षमा रहेका दल तथा सबै माननीय सदस्यलाई संवादको वातावरण सिर्जना गरी सदनलाई आफ्नो मूल लयमा फर्काउन अपिल गरे । सभामुखको अपिलपछि बोलेका रास्वपा र राप्रपाका सांसद्ले समय मागेर आफूले आफ्ना धारणा राखे । अनि सभामुखको अपिल बेवास्ता उनीहरु सदनबाट बाहिरिए ।
