चीन भ्रमणमा रहेका प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच तियान्जिनमा आइतबार साइडलाइन भेटवार्ता भएको छ।
सांघाई सहयोग संगठन (एससीओ) को २५ औँ शिखर सम्मेलनको अवसर पारेर भएको यस भेटको तस्बिर प्रधानमन्त्री मोदीले सामाजिक सञ्जाल 'एक्स' मार्फत सार्वजनिक गर्दै नेपाल–भारत सम्बन्धलाई ‘गहिरो र विशेष’ भनेका छन्।
‘तियान्जिनमा नेपालका प्रधानमन्त्री केपी शर्मा ओलीज्यूलाई भेट्न पाउँदा खुसी लाग्यो। भारतको नेपालसँगको सम्बन्ध गहिरो र विशेष छ,’ मोदीले एक्समा लेखेका छन्। भेटका क्रममा प्रधानमन्त्री ओलीसँग उनकी पत्नी राधिका शाक्य पनि उपस्थित थिइन्।
प्रधानमन्त्री ओली चिनियाँ राष्ट्रपति सी चिनफिङको औपचारिक निमन्त्रणामा उक्त सम्मेलनमा सहभागी हुन अहिले चीनमा छन्। उनले राष्ट्रपति सी चिनफिङसँग भेटवार्ता गरिसकेका छन् ।
प्रधानमन्त्री ओलीको चीन भ्रमणलाई नेपाल–चीन सम्बन्ध मजबुत बनाउने अवसरको रूपमा हेरिएको छ भने तियान्जिनमा भएको ओली–मोदी भेटले नेपाल–भारत सम्बन्धलाई थप ऊर्जा दिने अपेक्षा गरिएको छ।
