राष्ट्रिय सभा अध्यक्ष नारायणप्रसाद दाहाल र अस्ट्रेलियाको संसद् हाउस अफ रिप्रेजेन्टेटिभका सभामुख मिल्टन डिकबीच द्विपक्षीय भेटवार्ता भएको छ। अन्तर व्यवस्थापिका संघ को १५१ औं महासभाको सन्दर्भमा जेनेभामा रहेका अध्यक्ष दाहालले अस्ट्रेलियाली सभामुखसँग भेट गरेका हुन्।
भेटमा दुवै नेताबीच दुई देशका बीचको आपसी सम्बन्ध, द्विपक्षीय हित र सहयोगका विषयमा छलफल भएको थियो। विशेषगरी, संसदीय सहकार्यका बिभिन्न पक्षहरूमा समझदारीका साथ विचारविमर्श गरिएको जनाइएको छ।
अस्ट्रेलियाले नेपालमा शिक्षा, स्वास्थ्य, सुशासन र सामुदायिक वन व्यवस्थापनका क्षेत्रमा ठूलो योगदान पुर्याएको उल्लेख गर्दै अध्यक्ष दाहालले आगामी दिनमा जलवायु परिवर्तन, नवीकरणीय ऊर्जा, र स्थानीय सुशासन जस्ता क्षेत्रमा सहकार्य गर्ने विश्वास व्यक्त गरे।
अध्यक्ष दाहालले अस्ट्रेलियामा १ लाख ८० हजारभन्दा बढी नेपाली नागरिक रहेको र तीमध्ये ६० हजारभन्दा बढी नेपाली विद्यार्थी अस्ट्रेलियामा अध्ययनरत रहेको जानकारी दिए।
अस्ट्रेलियामा रहेका नेपाली समुदाय र विद्यार्थीहरूको सुरक्षा, सम्मान र सहयोगी वातावरणका लागि धन्यवाद व्यक्त गर्दै, अध्यक्ष दाहालले शैक्षिक साझेदारी, प्राविधिक तालिम, र अनुसन्धान आदानप्रदान जस्ता पहलहरूलाई अझ विस्तारमा जोड दिन आग्रह गरे।
