नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले देशको वर्तमान अवस्था सम्हाल्ने जिम्मा अब माओवादीकै काँधमा आएको बताएका छन्।
नेकपा माओवादी केन्द्र गोरखाद्वारा आइतबार आयोजित कार्यकर्ता भेटघाट तथा प्रशिक्षण कार्यक्रममा सम्बोधन गर्दै प्रचण्डले जनजीवनका मुद्दा र राजनीतिक अस्थिरता समाधान गर्ने शक्ति माओवादी भएको दाबी गरे।
‘हाम्रो पार्टीले अहिले देशभर जिल्ला–जिल्ला र गाउँ–गाउँसम्म कार्यक्रम सञ्चालन गरिरहेको छ,’ प्रचण्डले भने, ‘आम जनताले अबको चुनावबाट देश सम्हाल्न माओवादी नै आउनुपर्छ भन्ने विश्वास व्यक्त गर्न थालेका छन्।’
उनले आसन्न निर्वाचनलाई सफल पार्न सबै राजनीतिक दल र कार्यकर्तालाई तयारीमा जुट्न आग्रह गरे।
‘अब चुनाव घोषणा भइसकेको छ। चुनाव सफल पार्नु नै हाम्रो पहिलो कार्यभार हो,’ प्रचण्डले भने, ‘सरकारले निष्पक्ष निर्वाचनको वातावरण सुनिश्चित गर्नुपर्छ। चुनाव हुन्छ कि हुँदैन भन्ने होइन, अब चुनावमा लाग्नुबाहेक कुनै विकल्प छैन।’
