जनकपुर, मंसिर १८ :
मधेश प्रदेशमा नयाँ सरकार गठनका लागि बसेको सात दलबीचको बैठक निष्कर्षविहीन बनेको छ। कांग्रेस र लोसपाले आ–आफ्नो दाबी नछोडेपछि बैठक बिनानिष्कर्ष टुंगिएको जसपा नेपालका प्रमुख सचेतक राम आशिष यादवले बताए।
उनका अनुसार कांग्रेसले प्रदेशमा सबै दलको नेतृत्वमा सरकार बनिसकेको र अब आफ्नो ‘पाला’ आएको भन्दै मुख्यमन्त्री आफ्नो पार्टीलाई दिनुपर्ने अडान राखेको छ। तर लोसपाले भने जितेन्द्र सोनल नेतृत्वको सरकार लामो समय टिक्न नपाएको र अपमानजनक रूपमा हट्नुपरेको कारण देखाउँदै फेरि एक पटक लोसपालाई नेतृत्वको अवसर दिनुपर्ने माग राखेको छ। दुवै दलका दाबी मजबुत भएपछि छलफल अघि बढ्न नसकेको यादवले बताए।
