राष्ट्रपति रामचन्द्र पौडेलले प्रमुख तीन दलका शीर्ष नेताहरुसँग छलफल गरेका छन् ।
राष्ट्रपति भवनमा प्रधानमन्त्री सुशीला कार्कीसहितको उपस्थितिमा राष्ट्रपतिले नेपाली कांग्रेसका सभापति शेरबहादुर देउवा, नेपाल कम्युनिष्ट पार्टी (एमाले) का अध्यक्ष केपी शर्मा ओली र नेपाली कम्युनिष्ट पार्टीका संयोजक पुष्पकमल दाहाल ’प्रचण्ड’ सँग छलफल गरेका हुन् ।
जेनजी आन्दोलनपछि उनीहरुबीच भएको यो पहिलो भेट हो । एमाले अध्यक्ष ओलीले प्रधानमन्त्री कार्कीसँग छलफल नगर्ने अडान लिएपछि राष्ट्रपति पौडेलले प्रमख दलका नेता र प्रधानमन्त्रीबीचको संवादको वातावरण बनाएका हुन् ।
छलफलमा सरकार र तीन दलबीच फागुन २१ गते हुने निर्वाचनको वातावरण बनाउन समझदारी भएको राष्ट्रपतिका प्रेस सल्लाहकार किरण पोखरेलले बताए।
राष्ट्रपति र प्रधानमन्त्रीसहित तीन दलका शीर्ष नेताबीच छिट्टै बालुवाटारमा छलफल गर्ने समझदारी बनेको पनि पोखरेलले बताए ।प्रधानमन्त्री कार्कीले तोकिएकै समयमा निर्वाचन गराउन सबै दलले सहयोग गर्नुपर्ने बताएको पनि पोखरेलले जानकारी दिए ।
उनीहरूबीच आगामी निर्वाचनका साथै समसामयिक विषयमा छलफल भएको राष्ट्रपतिको सचिवालयले जनाएको छ ।
