फाइल तस्बिर ।
नेपाली कांग्रेसका सभापति शेरबहादुर देउवाले निर्वाचनको मुखमा महाधिवेशन गर्दा चुनावी परिणाममा नकारात्मक असर पर्न सक्ने बताएका छन्।
मङ्गलबार काठमाडौँमा पत्रकारहरूसँगको भेटघाटमा देउवाले महाधिवेशन अगाडि नै गर्ने निर्णय भए त्यसमा अवरोध नगर्ने स्पष्ट पारे।
आफूले पार्टीका नेताहरूलाई यस्तो सुझाव दिएको जनाउँदै देउवाले १५औँ महाधिवेशनमा आफू प्रतिस्पर्धी नरहने र तटस्थ भूमिका निभाउने बताए।
विधानअनुसार सभापतिमा उम्मेदवार बन्न नमिल्ने र व्यक्तिगत इच्छा पनि नभएकाले अन्य नेताहरूलाई मात्र प्रोत्साहन गर्ने उनको भनाइ थियो।
देउवाले भने, ‘निर्वाचनअघि महाधिवेशन गर्दा पार्टीभित्रको प्रतिस्पर्धाको असर पर्छ भनेर मैले भनिरहेको छु,तर गर्ने नै हो भने मैले रोक्ने कुरा हुँदैन।’
देउवाले विशेष महाधिवेशन गर्दा त्यसको प्रक्रिया र विधिका विषयमा फेरि विवाद हुने भएकाले नियमित महाधिवेशनमै सहमतिमा जानु उपयुक्त हुने धारणा व्यक्त गरे ।
