संस्कृति, पर्यटन तथा नागरिक उड्डयनमन्त्री अनिलकुमार सिन्हाले त्रिभुवन विमानस्थलको सेवामा सुधार गर्न निर्देशन दिएका छन् ।
नेपाल नागरिक उड्डयन प्राधिकरणको २७ औं वार्षिकोत्सवका अवसरमा बुधबार काठमाडौंमा आयोजित कार्यक्रममा मन्त्री सिन्हाले त्रिभुवन विमानस्थलको संरचनात्मक सुधार देखिएपनि आम नागरिक र पर्यटकले गुणस्तरीय सेवा पाउन नसकेको भन्दै सेवामा सुधार गर्न निर्देशन दिएका हुन् ।
विमानस्थलमा प्रवेश गरेदेखि बाहिरिदासम्मको असहज परिस्थिति स्वयं आफैले भोगेको उनले बताए । मन्त्री सिन्हाले आफू अन्तरिम सरकारको मन्त्री भएकाले धेरै समय नरहेपनि बाँकी रहेको समयमा सुधारका लागि निरन्तर प्रयास गर्ने उल्लेख गरे ।
नेपालमा हवाई यात्रा विलासिता नभई जीवनपद्धती बन्न पुगेकाले यस क्षेत्रलाई नागरिक मैत्री बनाउनुपर्नेमा उनले जोड दिए ।
मन्त्री सिन्हाले विमान दुर्घटनाको निष्पक्ष र प्रावधिक छानबिनका लागि स्थायी र अधिकारसम्पन्न स्वतन्त्र विमान दुर्घटना आयोग वा कुनै स्वतन्त्र निकायको स्थापना गर्ने विषयमा रणनीतिक सम्बोधन गर्न अतिआवश्यक रहेको बताए ।
