काठमाडौं, पुस २८ :
नेपाली कांग्रेसका सभापति शेरबहादुर देउवाले आफू निकट नेताहरूसँग छलफल गर्दैछन् । सभापति देउवाले अहिले दिउँसो ३ बजे आफू निकट नेताहरुलाई छलफलका लागि बोलाएका छन् ।
महामन्त्रीद्वय गगन थापा र विश्वप्रकाश शर्माको नेतृत्वमा जारी विशेष महाधिवेशनले कार्यविधि समेत पारित गरेपछि देउवाले आफू निकटस्थ नेताहरूलाई छलफलमा बोलाएका हुन् ।
यसअघि देउवाले विशेष महाधिवेशनको वैधानिकतालाई लिएर आफूनिकट नेता तथा कानुन व्यवसायीसँग छलफल समेत गरिसकेका छन् । सभापति देउवालाई अभिभावकीय भूमिका निर्वाह गर्नका लागि विशेष महाधिवेशनमा सहभागी हुन दुई महामन्त्रीले पटक-पटक आह्वान गर्दै आएका छन् ।
संस्थापन पक्षको अस्वीकारबीच अहिले काठमाडौंको भृकुटीमण्डपमा विशेष महाधिवेशन जारी छ । महाधिवेशनको बन्दसत्रमा दुई महामन्त्रीले छुट्टाछुट्टै प्रतिवेदन पेस गरेका छन् ।
