देउखुरीको कालाकाटे क्षेत्रमा टिपरले अटोलाई ठक्कर दिँदा एक जनाको मृत्यु भएपछि मृतकका आफन्तले राजमार्ग अवरुद्ध पारेका छन्।
टिपर ठक्करबाट अटोचालकको मृत्युपछि आफन्तले दोषीमाथि कारबाही र क्षतिपूर्ति माग गर्दै पूर्वपश्चिम राजमार्गअन्तर्गत दाङको कालाकाटेमा सडक अवरुद्ध पारेका हुन्।
मृतकका आफन्तहरूले सडकमै आगो बालेर यातायात सञ्चालनमा रोक लगाएका कारण राजमार्गमा सयौं गाडी अलपत्र परेका छन् ।सडक खुलाउने प्रयास भइरहेको प्रहरीले जनाएको छ ।
ना८ख ३२६४ नम्बरको टिपर र रा१ह ७३५५ नम्बरको अटोरिक्सा बिहीबार बिहान गढवा गाउँपालिका-१ कालाकाटेमा ठोक्किँदा अटोचालक ३६ वर्षीय जोरकुमार पुनको मृत्यु भएको थियो ।अटोमा विद्यालय जान लागेको ५ जना विद्यार्थी रहेको र उनीहरू पनि घाइते भएको प्रहरीले जनाएको छ । दुर्घटनामा संलग्न टिपर र चालकलाई इलाका प्रहरी कार्यालय गढवाले नियन्त्रणमा लिएको छ ।
