सार्वजनिक शान्तिमा खलल पुर्याएको भन्दै मेडिकल व्यवसायी दुर्गा प्रसाईंलाई भक्तपुरस्थित आफ्नै निवासबाट गए राती पक्राउ गरिएको छ ।
उनलाई सार्वजनिक शान्तिमा खलल पुर्याएको कसुरमा मुद्दा चलाइने भएको छ । यो कसुरमा बढीमा २५ दिनसम्म प्रहरी हिरासतमा राखेर अनुसन्धान गर्ने कानूनी व्यवस्था रहेको छ ।
निर्वाचन आयोगले गरेको पत्राचारका आधारमा उनलाई पक्राउ गरिएको काठमाडौँका जिल्ला प्रहरी प्रवक्ता एसपी पवनकुमार भट्टराईले जानकारी दिनुभयो । प्रसाईका गतिविधिहरु तथा अभिव्यक्तिबाट सार्वजनिक शान्तिमा असर गरेको भनी निर्वाचन आयोगले जिल्ला प्रहरी परिसर भद्रकालीलाई पत्र लेखेको थियो । उनलाई बाहिर राख्नु सार्वजनिक शान्तिमाथि ठूलो चुनौती हुने आयोगको ठहर भए बमोजिम गएराति नै पक्राउ गरिएको हो ।
प्रसाईंलाई हिरासतमा राख्नका लागि आज नै म्याद थपका लागि जिल्ला अदालतमा पेश गरिदैछ ।
