बल्खुस्थित सुकुमवासी बस्तीका ६१ वर्षका इन्द्रबहादुर राई मृत फेला परेका छन् । आज दिउँसो उनको शव बागमती नदीमा भेटिएको प्रहरीले जनाएको छ । स्थानीयका अनुसार जागरण टोलका उनी आफ्नो घरमा डोजर चलाएपछि विरक्तिएका थिए । मृतककी श्रीमतीले पनि घरमा डोजर चलाएपछि उनी निराश भएर हिँडेको बताइन् ।
काठमाडौंका खोला किनारका अतिक्रमित बस्ती हटाउने क्रममा सरकारले शुक्रबार बिहानै बल्खु र टेकु नजिक पर्ने वंशीघाट, शंखमूललगायत क्षेत्रमा डोजर चलाएको छ । बाक्लो सुरक्षा घेराकाबीच डोजर चलाएर धमाधम अतिक्रमित बस्ती भत्काइएको छ । वर्षौंदेखि बस्दै आएको भवनमा डोजर चलेपछि त्यहाँका अधिकांश मानिसहरु विक्षिप्त भएका छन् ।
सुकुमवासी बस्ती हटाउँदा नम्बरी जग्गाधनी त्रसित, घरमै टाँसे लालपूर्जाको प्रतिलिपि
सुकुम्बासी बस्तीका अभिभावकहरुलाई अब कसरी गाँसबासको जोहो गर्ने ध्याउन्न हुँदा केटाकेटीलाई भने आफ्नो टोलका साथीहरु अब कहाँ भेटिएलान् भन्ने चिन्ता छ ।
