कागेश्वरी मनोहरा नगरपालिकाद्वारा आयोजित एक दिवसीय विपद् न्यूनीकरण तथा अग्नि नियन्त्रण सम्बन्धी सचेतना तथा प्रयोगात्मक प्रशिक्षण कार्यक्रम सम्पन्न भएको छ।
नगरपालिकाको विपद् व्यवस्थापन शाखाको आयोजनामा शुक्रबार थलीस्थित नगरपालिका परिसरमा आयोजित कार्यक्रममा सम्भावित आगलागीका घटनालाई न्यूनीकरण गर्ने तथा विपद्का बेला अपनाउनुपर्ने सुरक्षाका उपायबारे सहभागीहरूलाई जानकारी गराइएको थियो।
प्रशिक्षणका क्रममा विपद् व्यवस्थापन विशेषज्ञ तथा प्रशिक्षकले आगलागीका विभिन्न प्रकार, तिनका कारण तथा नियन्त्रणका उपायबारे जानकारी दिएका थिए। साथै फायर नियन्त्रण यन्त्र (फायर एक्स्टिङ्गुइशर) को बनोट, सही प्रयोग विधि तथा बजारमा उपलब्ध आधुनिक ‘फायर बल’ को उपयोगिताबारे समेत सहभागीहरूलाई प्रशिक्षण दिइएको थियो।
खुला चौरमा प्रयोगात्मक अभ्यास सञ्चालन गरिएको थियो। उक्त अभ्यासमा ग्यास सिलिन्डरमा लाग्न सक्ने आगो नियन्त्रण गर्ने विधि तथा घरेलु सामग्री र प्रविधिको प्रयोगमार्फत सुरक्षित रूपमा आगो निभाउने तरिका प्रत्यक्ष रूपमा प्रदर्शन गरिएको थियो। विशेषगरी घरगृहस्थी सम्हाल्ने महिलाहरूले भान्छाघर तथा ग्यास सिलिन्डरसँग सम्बन्धित आगलागी नियन्त्रणका व्यावहारिक अभ्यासमा उत्साहपूर्वक सहभागिता जनाएका थिए।
कार्यक्रमका सहजकर्ता तथा नगरपालिकाका प्रतिनिधिहरूले यस्ता सचेतनामूलक कार्यक्रमले समुदायलाई आत्मनिर्भर बनाउन र सम्भावित विपद्बाट हुने धनजनको क्षति न्यूनीकरण गर्न महत्वपूर्ण भूमिका खेल्ने विश्वास व्यक्त गरेका छन्।
सहभागीहरूले पनि घरमा हुन सक्ने ग्यास चुहावट तथा सानातिना आगलागीका घटनामा नआत्तिई सुरक्षित रूपमा सामना गर्ने व्यावहारिक ज्ञान प्राप्त भएको भन्दै कार्यक्रमप्रति खुसी व्यक्त गरेका थिए। कार्यक्रममा नगरपालिकाभित्रका विभिन्न टोल सुधार समिति, महिला समूह तथा स्थानीय बासिन्दाहरूको उल्लेखनीय सहभागिता रहेको थियो।
