विशेष अदालतले सम्पत्ति शुद्धीकरण मुद्दाको अनुसन्धानका क्रममा पक्राउ गरिएका एमाले उपाध्यक्ष विष्णुप्रसाद पौडेललाई थप ३ दिन थुनामा राखेर अनुसन्धान गर्न अनुमति दिएको छ ।
सम्पत्ति शुद्धीकरण अनुसन्धान विभागले सोमबार पौडेललाई म्याद थपका लागि विशेष अदालतमा पेश गरेको थियो । विशेष अदालतका न्यायाधीश नारायणप्रसाद पौडेल, हेमन्त रावल र उमेश कोइरालाको इजलासले थप ३ दिन थुनामा राखेर अनुसन्धान गर्न विभागलाई अनुमति दिएको हो ।
यसअघि विभागको पत्रका आधारमा प्रहरीले उपाध्यक्ष पौडेललाई गत असार ८ गते सोमबार सुर्खेतबाट पक्राउ गरिएको थियो । अदालते असार ८ देखि लागू हुने गरी सात दिन हिरासतमा राख्न अनुमति दिएको थियो, सात दिनको म्याद सकिएसंगै पुन म्याद थपका लागि बिभागले पौडेललाई सोमबार अदालतमा हाजिर गराएको हो । अदालतको आदेश बमोजिम पौडेललाई न्यायिक हिरासतमा पठाइएको विशेष अदालतका सूचना अधिकारी पार्वती हितानले जानकारी दिए ।
श्रीराम टोबाको प्रालिको २० प्रतिशत शेयर हिमालयन एसेस्ट म्यानेजमेन्ट प्रालिले खरिद गरेको विषयमा भइरहेको अनुसन्धानका सिलसिलामा पौडेललाई पक्राउ गरेको विभागले जनाएको छ ।
