दोस्रो हाफमा किलियन एम्बाप्पेले पेनाल्टीमार्फत गरेको एकमात्र गोलको मद्दतले फ्रान्सले संघर्षशील पाराग्वेलाई १–० ले पराजित गर्दै फिफा विश्वकपको क्वार्टरफाइनलमा स्थान बनाएको छ। अब फ्रान्सले अन्तिम आठमा मोरक्कोसँग प्रतिस्पर्धा गर्नेछ।
शनिबार फिलाडेल्फियामा ६८ हजार ३२४ दर्शकमाझ अत्यधिक गर्मीका बीच भएको अन्तिम १६ को खेलमा पाराग्वेले फ्रान्सका स्टार खेलाडीहरूलाई लामो समयसम्म दबाबमा राख्दै खेललाई प्रतिस्पर्धात्मक बनाएको थियो।
तर अन्ततः फ्रान्सको स्तर र अनुभव निर्णायक बन्यो। खेलको ७०औँ मिनेटमा डिजिरे डुएलाई पेनाल्टी क्षेत्रमा लडाइएपछि प्राप्त पेनाल्टीलाई किलियन एम्बाप्पेले सफलतापूर्वक गोलमा परिणत गर्दै टोलीलाई अग्रता दिलाए।
यसअघिका खेलहरूमा जस्तो आक्रामक प्रदर्शन फ्रान्सले गर्न नसके पनि पाराग्वेले उनीहरूलाई खुलेर खेल्न दिएको थिएन। यद्यपि खेलभरि बलमाथिको नियन्त्रण भने फ्रान्सकै रह्यो। पाराग्वेले खेलको ९०औँ मिनेटसम्म गोलपोस्टतर्फ पहिलो प्रहारसमेत गर्न सकेन।
एम्बाप्पेले यस गोलसँगै प्रतियोगितामा आफ्नो गोल संख्या सात पुर्याउँदै लियोनेल मेस्सीसँग संयुक्त रूपमा सर्वाधिक गोलकर्ताको स्थानमा पुगेका छन्।
रियल मड्रिडका स्ट्राइकर एम्बाप्पेको विश्वकपमा कुल गोल संख्या १९ पुगेको छ जुन उनले १९ खेलमा गरेका हुन्। उनी अब मेस्सीको २० विश्वकप गोलको कीर्तिमानभन्दा केवल एक गोलले पछाडि छन्।
प्रशिक्षक दिदिए देसाँको टोली अब बोस्टन फर्किनेछ, जहाँबाट उनीहरूले आगामी बिहीबार नजिकैको फक्सबरोमा हुने क्वार्टरफाइनलमा मोरक्कोसँगको खेलको तयारी गर्नेछन्। मोरक्कोले यसअघि क्यानडालाई ३–० ले पराजित गर्दै अन्तिम आठमा स्थान बनाएको थियो।
फिलाडेल्फियामा खेलका दिन तापक्रम ३८ डिग्री सेल्सियस पुगेको थियो। अत्यधिक गर्मीका साथै सम्भावित आँधीबेहरीका कारण मौसमसम्बन्धी विशेष सतर्कता जारी गरिएको थियो।
समूह चरणमा फ्रान्सले यही मैदानमा इराकलाई ३–० ले हराउँदा वर्षा र चट्याङका कारण खेल दुई घण्टा रोकिएको थियो। तर यसपटक कुनै अवरोध बिना खेल सम्पन्न भयो। अमेरिकी स्वतन्त्रताको २५०औँ वार्षिकोत्सव तथा सन् १७७६ मा स्वतन्त्रताको घोषणा पत्रमा हस्ताक्षर भएको ऐतिहासिक सहर फिलाडेल्फियामा विशेष कार्यक्रमसहित खेल आयोजना गरिएको थियो।
खेलअघि आयोजित कार्यक्रममा अभिनेत्री इडिना मेन्जेलले अमेरिकी राष्ट्रिय गान प्रस्तुत गरेकी थिइन्। हिप–हप ब्यान्ड ‘द रुट्स’ले सांगीतिक प्रस्तुति दिएको थियो भने अमेरिकी वायुसेनाले फ्लाइओभर पनि गरेको थियो।
विश्व वरीयताको ४१औँ स्थानमा रहेको पाराग्वेले अघिल्लो चरणमा जर्मनीलाई पेनाल्टी सुटआउटमा हराउँदै अन्तिम १६ मा स्थान बनाएको थियो।
