सरकारका केही मन्त्रीहरुले गैरराजनीतिक गतिविधि गरे, तत्काल रोक्न सांसद मल्लको ध्यानाकर्षण

नेपाली कम्युनिस्ट पार्टी(नेकपा)का सांसद रमेशकुमार मल्लले सरकारका केही मन्त्रीहरुले गैरराजनीतिक गतिविधि गरेको भन्दै त्यस्ता गतिविधि तत्काल रोक्न ध्यानाकर्षण गराएका छन् ।

मंगलबार प्रतिनिधिसभा बैठकमा सांसद मल्लले सरकारका केही मन्त्रीहरूले विपक्षी र सर्वसाधारणलाई तर्साउने, धम्क्याउने र गैरराजनीतिक अभिव्यक्ति दिने गरेको भन्दै त्यस्ता गतिविधि तत्काल रोक्न ध्यानाकर्षण गराएका हुन् ।  

त्यस्तै उनले जलविद्युत सुरुङमा खोजी कार्यको अवस्थाका बारेमा जानकारी दिन माग गरे । बेपत्ता तथा मृतकका आफन्तहरू अन्तिम संस्कारका लागि डीएनए रिपोर्टको पर्खाइमा रहेकाले परीक्षण छिटो सम्पन्न गरी परिवारलाई आधिकारिक जानकारी दिन समेत उनले माग गरे । उनले प्रहरी संगठनले आफ्ना सुरक्षाकर्मीका लागि राहत घोषणा गरेजस्तै मृतक तथा बेपत्ता आम नागरिकका परिवारका लागि पनि सरकारले तत्काल राहत र पुनस्र्थापना प्याकेज ल्याउनुपर्ने धारणा राखे । 

उनले होल्डिङ सेन्टरमा रहेका बालबालिकाको नियमित पठनपाठन तत्काल सुरु गर्न, बालबालिका लक्षित मनोपरामर्श र किशोरी सुरक्षा कार्यक्रम सञ्चालन गर्न र प्रभावित क्षेत्रका एसईई दिने विद्यार्थीहरूका लागि विशेष प्याकेजसहितको कक्षा सञ्चालन गर्न आग्रह गरे ।

साथै सांसद मल्लले देशभरका अभिभावकविहीन बालबालिकाको संरक्षण र शिक्षाको जिम्मेवारी लिन संघीय सरकारले एकरूप नीति घोषणा गर्नुपर्ने बताए । बाढीबाट बगेका सडक र झोलुङ्गे पुलको ठाउँमा तुइन नभई तत्काल बेलिब्रिज तथा सुरक्षित झोलुङ्गे पुल समयसीमा तोकेर निर्माण गर्नुपर्ने उनको भनाइ छ ।