बन्दसत्रमा पेस भएका चारै प्रतिवेदन आजै पारित गर्ने तयारी, भोलिदेखि उम्मेदवारी दर्ता

नेपाली कांग्रेसको १५औँ महाधिवेशनअन्तर्गत बन्दसत्रमा पेस भएका चारवटै प्रतिवेदन आजै पारित गर्ने तयारी गरिएको छ। 

महाधिवेशनको दोस्रो दिन आयोजित बन्दसत्रमा सभापति गगन थापाले राजनीतिक, उपसभापति विश्वप्रकाश शर्माले समसामयिक, महामन्त्री गुरुराज घिमिरेले सांगठनिक र कोषाध्यक्ष उमेश श्रेष्ठले आर्थिक प्रतिवेदन पेस गरेका हुन्।

पेस भएका चारवटै प्रतिवेदनमाथि तीनवटा हलमा छलफल भइरहेको छ। कांग्रेसले बन्दसत्रका लागि हिमाल, पहाड र तराई नामका तीनवटा हलमा प्रतिनिधिहरूलाई विभाजन गरेको छ। प्रतिवेदनमाथिको छलफल सम्पन्न गरी आजै चारवटै प्रतिवेदन पारित गर्ने तयारी रहेको कांग्रेसले जनाएको छ। 

यसैबीच, महाधिवेशनमा नेतृत्व चयनका लागि मंगलबारदेखि उम्मेदवारी दर्ता प्रक्रिया सुरु हुँदैछ। निर्वाचन कार्यतालिकाअनुसार मंगलबार बिहान १० बजेदेखि उम्मेदवारी दर्ता गर्ने कार्यक्रम तय गरिएको छ।उम्मेदवारी दर्तासँगै महाधिवेशनको निर्वाचन प्रक्रिया औपचारिक रूपमा अघि बढ्नेछ।