काठमाडौं, असोज ३० :
नेपाली कांग्रेसले भूमि र वनसम्बन्धी अध्यादेशप्रति आपत्ति जनाउदै सदनमार्फत अघि बढाउन आग्रह गरेको छ ।
शुक्रबार सिंहदरबारमा पत्रकार सम्मेलन गर्दै कांग्रेस ससदीय दलले वन सम्बन्धी केही नेपाल ऐनलाई संशोधन गर्ने अध्यादेश र भूमि सम्बन्धी केही नेपाल ऐन संशोधन गर्ने अध्यादेशप्रति आपत्ति जनाएको हो ।
कांग्रेस प्रमुख सचेतक वासना थापाले आकस्मिक परिस्थितिमा अध्यादेश जारी गर्नु संवैधानिक कुरा भए पनि, संसद् बन्द भएको छोटो समयमै अध्यादेश आउनुको औचित्यमाथि प्रश्न उठाइन् । उनले संसदको अधिकार क्षेत्रभित्र पर्ने विषयहरूमा संसद् छलेर अध्यादेशमार्फत कानुन ल्याउनुको सट्टा सदनमै दफावार छलफल गरेर अगाडि बढाउनुपर्ने धारणा व्यक्त गरिन् ।
उनले भूमि सम्बन्धी अध्यादेशमा यसअघि पनि कांग्रेसले विरोध गरेको र अहिले पनि सोही अध्यादेश ल्याउँदा पार्टीको विमति कायमै रहेको बताइन् ।
