काठमाडौं, माघ ७ :
काठमाडौं उपत्यका विकास प्राधिकरणले काठमाडौं महानगरपालिका ७ स्थित धोबिखोला करिडोरमा सरकारी जग्गा अतिक्रमण गरी बनाइएको भवनहरु भत्काउन सुरु गरेको छ ।
प्राधिकरणको टोलीले आइतबार काठमाडौंको चाबहिलस्थित मालपोत कार्यालयनजिक रहेका भवनहरु भत्काउन सुरु गरेको हो । भवन बनाउँदा सरकारी जग्गा मिचेर बनाएकाले भवन भत्काउनुपरेको प्राधिकरणको भनाइ छ ।
भवन भत्काउने क्रममा स्थानीयले केहीबेर अवरोध गरेका थिए । मापदण्डविपरीतको संरचना, सार्वजनिक जग्गामा बनेका संरचना हटाउने कार्यअनुसार आजबाट काम थालिएको उपत्यका विकास प्राधिकरणले बताएको छ ।
धोबिखोला र बागमती नदी किनारमा करिब ५ सय रोपनी सार्वजनिक जग्गा अतिक्रमण भएको बताइएको छ ।
