चिनियाँ दूतावासले नयाँ वर्षको कार्यक्रम ठमेलमा गर्न मागेको अनुमतिलाई काठमाडौं महानगरले अस्वीकार गरेको छ ।
चिनियाँ दूतावासले ठमेल क्षेत्रमा जनवरी २९ देखि सुरु हुने चिनियाँ नयाँ वर्षमा एक महिने विशेष कार्यक्रम गर्न अनुमति मागेको थियो ।
महानगरले अस्वीकार गर्दै धुलाम्मे चक्रपथमा कार्यक्रम गर्न ठाउँ देखाएको बुझिएको छ । चक्रपथ विस्तारको काम चीन सरकारले नै गरिरहेको छ । समयमै निर्माण सम्पन्न नहुँदा धुलाम्मे सडकमा हिँडिसक्नु छैन ।
सडकको अवस्था देखेर पैदलयात्रीले महानगरलाई गाली गर्न थालेपछि उसले त्यसमा आफ्नो संलग्नता नभएको देखाउन बोर्ड नै टाँगेको थियो ।
महानगरले सूचना लेखेर बोर्ड नै टाँसेपछि सडक विभागले त्यसलाई हटाएको थियो । कलंकी-महाराजगन्ज सडक विस्तारको काम नेपाल सरकार र चिनियाँ निर्माण कम्पनीले सुस्त गतिमा गरिरहेको छ । सडक विस्तारमा ढिलाइ भएपछि चौतर्फी आलोचना भएको छ ।
